Umræðan góð - en þarf að byggja á heildarmyndinni

Skólastjóri Salaskóla í Kópavogi segir að matseðillinn í mötuneyti skólans sé afar fjölbreyttur og eldamennskan fari fram í fullkomnu mötuneytiseldhúsi skólans.

Í þættinum Stóra Þjóðin, sem Inga Lind Karlsdóttir stýrir og er sýndur á Stöð 2, var fjallað um að venjulega máltíð úr mötuneyti Salaskóla sem reyndist óhollari en „sveitt pizzusneið" af skyndibitastað. Inga fékk efnafræðinga hjá Matís til að efnagreina snitsel-sneið úr mötuneytinu og reyndist hún innihalda 240 hitaeiningar í 100 grömmum, þar af 16 til 17% kolvetni og 11% fitu.

Í tilkynningu frá Kópavogsbæ segir að lærður matreiðslumaður sjái um eldhúsið og hafi hann þá stefnu að maturinn sé eins hollur og fjölbreyttur og mögulegt er og að hráefnið sé ferskt og gott.

„Áhersla er lögð á grænmeti og ávexti og er ferskur fiskur á matseðlinum tvisvar í viku. Efnagreining heimildarþáttarins Stóra þjóðin, sem sýndur var á Stöð 2 þann 8. júní sl., á næringargildi snitsel-sneiðar sem var í matinn í skólanum í vetur gefur því alls ekki rétta mynd af því fæði sem er á boðstólum. Umræðan um þessi mál er af hinu góða en hún þarf að byggja á heildarmyndinni," segir í tilkynningunni.

Nær allur matur í skólanum sé lagaður frá grunni í mötuneytinu en í einstökum tilvikum séu keyptir forunnir kjötréttir, eins og kjötbollur, pylsur og snitsel, en það hafi fjórum sinnum verið í boði í vetur.

„Af þeim 159 máltíðum sem framreiddar voru í Salaskóla í vetur voru 64 fiskmáltíðir, 47 kjötmáltíðir, spónamatur var 33 sinnum, pastaréttir 9 sinnum og annað, svo sem grænmetisbuff, vorrúllur og pizza, 6 sinnum."

Hægt er að sjá brot úr þættinum hér að ofan.