Yfirheyrslum yfir hælisleitendum lokið

Búið er að yfirheyra tvo menn sem fundust um borð í flugvél Icelandair á Keflavíkurflugvelli í nótt. Vélin var á leið til Kaupmannahafnar og höfðu mennirnir læst sig inn á salerni vélarinnar.

Mennirnir hafa nú greint frá því hvernig þeir komust inn á flugvöllinn. Ekki verður gefið upp hvernig þeim tókst að komast óséðir inn í flugvélina.

Samkvæmt upplýsingum frá Isavia er málið litið alvarlegum augum enda er um stórfellt brot á öryggisreglum að ræða.

Mennirnir fundust við reglubundna öryggisskoðun áhafnarinnar þegar hún kom um borð í vélina. Lögregla var kölluð til. Vélin fór síðan í loftið klukkan fimm í morgun.

RÚV greinir frá því að mennirnir eru hælisleitendur og að þeir búi á Fit-hosteli í Reykjanesbæ. Þeir komu hingað til lands fyrr á árinu og eru í hópi ungra hælisleitenda sem fjallað hefur verið um síðustu mánuði.