Dýrt að grilla í sumar

Grillveislurnar verða dýrari í sumar en síðustu ár. Þetta kemur fram í úttekt Viðskiptablaðsins sem kom út í dag.

Helstu kjötafurðir hafa hækkað um allt að 24% á síðustu tólf mánuðum.

Menn eru ekki sammála um hvað veldur hækkuninni.

Finnur Árnason, forstjóri Haga, telur framboðsstýringu ríkja á kjötmarkaði og að verðið hafi verið keyrt upp með skorti. Geir G. Geirsson, framkvæmdastjóri Stjörnugríss, segir það aftur á móti af og frá að fákeppni ríki á markaði. Hann grunar að hækkunin stafi m.a. af hækkandi verði á hrávöru.

Þannig hafa menn andstæðar hugmyndir um hvað valdi hækkununum. Eitt er þó víst. Dýrari grillveislur í sumar eru staðreynd.

Ítarlegri umfjöllun um málið má finna í Viðskiptablaðinu.