Strípalingar í umferðinni

Fjórir ungir menn tóku upp á því að afklæðast og spranga svo um Strandveg í Grafarvogi berir á tólfta tímanum í gær. Uppátækið fór fyrir brjóstið á einhverjum vegfarendum og lögreglan var kölluð á svæðið. Þegar lögreglan kom á vettvang voru strípalingarnir á bak og burt og höfðu vel að merkja haft föt sín með sér.

Að sögn sjónarvotts veifuðu mennirnir ýmist höndum eða héldu um sitt allra heilagasta þegar aðrir vegfarendur óku hjá.

Eflaust finnst einhverjum svona fíflaskapur sniðugur en lögreglan benti í tilkynningu á hve neyðarlegt hefði verið að lenda fyrir bíl við þessar aðstæður.