Vilja jafna réttindi útlendinga

samfélagsmál Ein löggjöf verður til um málefni útlendinga hér á landi ef tillögur starfshóps um málefni útlendinga utan Evrópska efnahagssvæðisins (EES) verða að veruleika.

Halla Gunnarsdóttir, aðstoðarmaður innanríkisráðherra og formaður starfshópsins, kynnti tillögur hópsins og starf á fundi á miðvikudag. Starfshópurinn vill einnig að útlendingar sem koma hingað til lands fái aukna fræðslu um réttindi sín og skyldur. Hugmynd hefur komið upp um að útbúa dvd-disk sem fók verði að horfa á hjá Útlendingastofnun þegar það sækir hér um dvalarleyfi.

Þá vill hópurinn að reglum verði breytt svo að dvalarleyfi veiti almennt rétt til atvinnu hér á landi, nema annað sé tekið sérstaklega fram.

Nefndin vill að réttindasöfnun útlendinga verði jöfnuð. Nú er það svo að fólk safnar ólíkum réttindum eftir því hvers konar dvalarleyfi það hefur hér á landi. Þannig getur fólk sem kemur hingað vegna skorts á vinnuafli fengið dvalarleyfi í ár og framlengt það í ár til viðbótar en getur aldrei unnið sér inn rétt til búsetuleyfis. „Þannig að við lítum á það fólk sem vinnuafl en við lítum á hitt fólkið sem fólk sem við viljum fá,“ sagði Halla og átti þar við fólk sem kemur hingað sem sérfræðingar.

Þá vill nefndin að allir sem það á við geti sótt um aðstandendadvalarleyfi til að sameina fjölskyldur. Þannig er það ekki nú. - þeb