Birgitta: Fulltrúalýðræðið hefur mistekist

Fulltrúalýðræðið er tilraun sem hefur mistekist, sagði Birgitta Jónsdóttir, þingmaður Hreyfingarinnar, við eldhúsdagsumræður á Alþingi í dag. Hún hvatti fólk til þess að taka virkan þátt í umræðunni um nýja stjórnarskrá.

„Ég myndi vilja kalla eftir dómgreind upplýstrar þjóðar, sér í lagi þegar þjóðaratkvæðagreiðsla um stjórnarskrána fer fram," sagði Birgitta. „Ég hvet ykkur til þess að skoða hvað ykkur finnst mikilvægt að sé hluti af þessum samfélagssáttmála okkar," bætti Birgitta við.

„Þessi tegund af lýðræði sem við búum við, þetta fulltrúalýðræði hefur mistekist, einfaldlega vegna þess að fólk er hætta að skipta sér af okkur," sagði Birgitta, en þar átti hún við að almenningur væri hætt að veita þingmönnum aðhald. „Við getum setið hér og það veit enginn hvað við erum að gera - við getum setið hér og verið að rífast um ekki neitt," sagði hún.

Birgitta sagði að mesta vinnan í þinginu færi fram í þingnefndum. Þar væru þingmenn ekki að rífast eins og þeir gerðu í þingsal þegar myndavélin færi í gang.