Al Thani málið dregst á langinn

Héraðsdómari veitti í dag verjendum sakborninga í svokölluðu al-Thani máli fresti til þess að skila greinargerðum í málinu til 1. október næstkomandi. Þeim hafði áður verið gefinn frestur til 12. júní.

Þeir Hreiðar Már Sigurðsson, fyrrverandi forstjóri Kaupþings, Sigurður Einarsson, fyrrverandi stjórnarformaður, Ólafur Ólafsson einn aðaleigandi bankans, og Magús Guðmundsson, fyrrverandi forstjóri Kaupþings í Lúxemborg, eru sakaðir um markaðsmisnotkun og umboðssvik með því að selja Mohammed bin Khalifa al-Thani 5% hlut í bankanum í sýndarviðskiptum rétt fyrir hrun bankans.

Við fyrirtöku málsins á fimmtudag fóru verjendur sakborninganna annars vegar fram á að fá afhentan lista yfir öll símtöl sem voru hleruð við rannsókn málsins og alla tölvupósta sem sérstakur saksóknari lagði hald á. Í úrskurði Péturs Guðgeirssonar dómara, sem sendur var verjendum í morgun, var þeirri kröfu hafnað. Hann samþykkti hins vegar að veita verjendum frest til þess að skila greinargerðum eins og fyrr segir.