Að leysa vanda fólksins

Fram hefur komið í fréttum að Íbúðalánasjóður og bankar hafa leyst til sín og eiga nú um 3.000-4.000 íbúðir. Íbúðalánasjóður átti einn um 2.000 íbúðir nú í október. Ef markaðsvirði þessara íbúða er að meðaltali 30-40 milljónir þýðir það að við það eitt hafa skuldir heimilanna lækkað um 120-160 milljarða. Þetta verður að taka með í reikninginn þegar ráðamenn hreykja sér af því að skuldir heimilanna hafi lækkað. Skuldir heimilanna hafa kannski lækkað en vandi fólksins, fjölskyldna sem misst hafa íbúð sína vegna skulda og hrakist af heimilum sínum út á rándýran leigumarkaðinn hefur aukist gífurlega.

Lán bankans breytist í fasteign

Þegar banki eignast íbúð vegna skuldar breytist eign bankans úr láni í fasteign. Þannig tapar bankinn engu. Þegar fjölskylda missir íbúð í hendur banka vegna skuldar tapar hún öllu því fé sem hún hefur í áraraðir greitt af láninu sem hvílir á íbúðinni. Ekki nóg með það. Þó að bankinn taki heimilið skuldar fjölskyldan ennþá mismuninn á markaðsvirði íbúðarinnar og áhvílandi láni hafi íbúðin verið yfirveðsett. Heimili með 110% fasteignalán eru yfirveðsett.

Öruggt heimili

Að fjölskyldur eigi öruggt heimili er ein af grunnstoðum hvers samfélags. Það ætti enginn að búa við þann yfirvofandi ótta, jafnvel árum saman, að missa heimili sitt. Að skapa öllum Íslendingum öruggt heimili er meginviðfangsefni stjórnvalda. Að skapa íslenskum fjölskyldum og börnum samastað þar sem þau geta lifað og búið örugg fyrir ágangi lánadrottna og kröfuhafa ætti að vera eitt af forgangsverkefnum stjórnmálamanna í nánustu framtíð.