Fengu eiturefnabúnað vegna lekans í Vesturbæjarlaug

Mikill viðbúnaður var við Vesturbæjarlaug í morgun eftir að Slökkviliði höfuðborgarsvæðisins barst tilkynning um kolsýruleka.

Það var rétt fyrir klukkan tíu í morgun sem slökkviliðið fékk tilkynninguna um lekann. Óttast var í fyrstu að um klórgas væri að ræða sem er eitrað. Sigurður Lárus Sigurðsson er varðstjóri hjá Slökkviliðinu á höfuðborgarsvæðinu.

„Við fórum strax á staðinn með einn dælubíl og þrjá sjúkrabíla og einnig kom lögreglan á staðinn og við gerðum ráðstafnir til að rýma sundlaugina og næsta nágrenni þetta er náttúrulega ekki gott að fá þetta út í andrúmsloftið og einnig fengum við frá Hafnarfirði aðstoð með eiturefnabúnað."

Fljótlega kom þó í ljós að ekki var um klórgas að ræða heldur einungis kolsýruleka. Lekinn myndaðist eftir að of mikið var sett á kolsýrutank í morgun. Efnið er notað til að drýja klórblönduna sem er notuð til að hreinsa sundlaugina.

„Sem að er miklu minni hætta af og reykkafarar fóru inn í rýmið og gátu skrúfað fyrir lekann."

Sigurður segir viðbúnað slökkviliðsins í morgun hafa verið mikinn. „Við vorum með mikinn viðbúnað og sendum mikið lið á staðinn þarna er rétt við hliðina, einhverja 200 metra frá, er leikskóli og einnig þétt íbúðabyggð þannig að við vorum með mikinn viðbúnað," sagði Sigurður Lárus Sigurðsson.