Markvisst forvarnarstarf

Þrjátíu og fimm þúsund manns, börn, unglingar og fullorðnir, hafa fengið fræðslu frá Blátt áfram á þeim sjö árum sem samtökin hafa starfað. Vitundarvakning hefur orðið í samfélaginu á þessum árum og umræða og ábyrgð fullorðinna hefur aukist.

Blátt áfram býður upp á fræðslu fyrir grunn-, leik- og framhaldsskóla landsins; fyrirlestra og námskeið fyrir fullorðna, lífsleikni fyrir unglinga, brúðuleikhús og teiknimynd fyrir yngstu börnin.

Fræðslan er fyrst og fremst fyrir fullorðna fólkið og við sjáum það enn í dag hversu misvel skólar eru undir það búnir að vernda börn. Þar sem ekki hefur verið markvisst nám í forvörnum í grunnnámi kennslustétta er ekki hægt að álasa þeim sem starfa í skólum landsins. Verndarar barna, námskeið Blátt áfram, breytir hegðun og viðhorfi starfsfólks til barnanna og vitað er að fjöldi tilkynninga hefur aukist eftir að skólar fengu fræðslu. Mikill fjöldi af símtölum til Blátt áfram kemur frá foreldrum og einstaklingum sem starfa með börnum og unglingum. Óöryggi þeirra er helst gagnvart óæskilegri hegðun barna og unglinga eða grun um kynferðisofbeldi.

Erfiðast hefur verið að ná til foreldra og hafa því samtökin ávallt haldið uppi fræðslunni í skólum landsins. Starfsfólk er einnig foreldrar og þannig hefur fræðslan skilað sér inn á heimilin og til barnanna. Með auglýsingum í fjölmiðlum hefur okkur einnig tekist að ná til þeirra sem hafa orðið fyrir ofbeldi og að þeir einstaklingar, börn jafnt sem fullorðnir, átta sig á því hvað kynferðislegt ofbeldi er og hve mikilvægt það er að leita sér hjálpar. Blátt áfram er í góðu samstarfi við helstu sérfræðinga landsins í málaflokknum og er fólki ávallt vísað til þeirra.

Gerðar verða rannsóknir á fræðslu Blátt áfram í samstarfi við Rannsóknastofnun í barna- og fjölskylduvernd. Verið er vinna að því að setja upp hjálparsíma í samstarfi við Rauða kross Íslands og Stop it Now í Bandaríkjunum og Englandi. Símalínan er fyrir aðstandendur barna sem sýna óæskilega hegðun og gerendur sem vilja leita sér aðstoðar. Koma að því sálfræðingar hér á landi sem vinna með gerendum.

Birtar hafa verið greinar í fjölmiðlum þar sem segir að enginn aðili fari með forvarnir gegn kynferðislegu ofbeldi gegn börnum á Íslandi og vill Blátt áfram leiðrétta það. Blátt áfram er eina félagið sem heldur úti forvarnarstarfi gegn kynferðislegu ofbeldi á Íslandi og hefur gert það síðan 2004. Fjöldi skóla sem fær árlega fræðslu fyrir nemendur er að aukast.

Blátt áfram er rekið af styrkjum og höfum við náð að bjóða upp á hluta af fræðslunni skólum að kostnaðarlausu og teljum mikilvægt að stjórnvöld leggi til fjármagn fyrir stofnanir til að fá markvissari fræðslu. Hins vegar erum við sammála því að fjármagn frá stjórnvöldum er og hefur ekki verið nægilegt til að skólar geti boðið upp á forvarnarfræðslu reglulega.

Blátt áfram telur mikilvægt að allar stofnanir skyldi starfsfólk sem starfar með börnum og unglingum á námskeið þar sem það fær þjálfun í hvernig meðvitað umhverfi eykur öryggi barna. Við höfum einnig séð hversu mikilvægt er að börn og unglingar fái fræðslu. Reynslan sýnir að um 10 % barna og unglinga leita sér aðstoðar í kjölfar fræðslu Blátt áfram. Slík fræðsla ætti að okkar mati að vera sett í námsskrá skóla, þannig að það sé ekki val einstakra skóla hvort þeir gefi sér tíma til að sinna því mikilvæga hlutverki að hlúa að öryggi barna.

Blátt áfram vill þakka forráðamönnum þeirra skóla og íþróttafélaga fyrir það góða fordæmi og þá skýru afstöðu til forvarna gegn kynferðislegu ofbeldi sem þeir hafa sýnt með því að sækja forvarnarfræðslu til Blátt áfram.