Tólf ár fyrir árásaráform

Fréttaskýring

Hvaða hryðjuverkamál hafa dönsk stjórnvöld þurft að glíma við?



Fjórir menn voru dæmdir í tólf ára fangelsi í gær fyrir að hafa ætlað að ráðast inn á skrifstofur Jótlandspóstsins í Kaupmannahöfn í desember árið 2010.

Þrír þeirra, Munir Award, Omar Abdallah Aboelazm og Munir Ben Mohammed Dhahri, voru handteknir 29. desember í húsi skammt frá Kaupmannahöfn. Sá fjórði, Sabhi Ben Mohammed Zalouti, var handtekinn daginn eftir í Svíþjóð, þar sem hann var nýkominn yfir landamærin frá Danmörku.

Mennirnir fjórir eru allir múslímar, búsettir í Svíþjóð en ættaðir frá Túnis, Egyptalandi og Líbanon. Leyniþjónustumenn höfðu fylgst með þeim mánuðum saman.

Mennirnir neituðu sök en á upptökum úr eftirlitsvélum í Stokkhólmi má heyra þá tala saman um Jótlandspóstinn, píslarvætti og vangaveltur um það hvernig þeir gætu drepið sem flest af fólki en samt tekið eina manneskju í gíslingu. Einnig heyrast þeir velta fyrir sér hvað þeir eigi að gera við konur og börn, en þeir virðast hafa ætlað að þyrma lífi þeirra.

Fyrsta málið árið 1993

Á síðustu árum hafa ellefu hryðjuverkamál komið til kasta lögreglunnar í Danmörku, samkvæmt samantekt á vefsíðu Politiken.

Hið fyrsta kom upp árið 1993 þegar þrír Egyptar voru ákærðir fyrir að hafa skipulagt sprengjuárásir á tvær lestarstöðvar í Kaupmannahöfn. Þeir voru á endanum sýknaðir af tengslum við hryðjuverk, en sakfelldir fyrir íkveikju.

Sex Norðurlandabúar, þar á meðal þrír danskir ríkisborgarar, voru handteknir í Bosníu í október árið 2005 grunaðir um hryðjuverkaáform. Þrír hlutu dóm í málinu en hinir voru látnir lausir vegna skorts á sönnunargögnum.

Eftir að danska dagblaðið Jyllandsposten birti skopmyndir af Múhameð spámanni haustið 2005 hafa strangtrúaðir múslímar haft horn í síðu Dana. Þau níu hryðjuverkamál sem hafa komið upp síðan hafa flest tengst eða verið talin tengjast myndunum.

Eitt þeirra kom upp í september árið 2007 þegar átta menn voru handteknir í Kaupmannahöfn grunaðir um tengsl við al-Kaída. Tveir voru á endanum dæmdir í tólf og sjö ára fangelsi fyrir að skipuleggja sprengjuárásir.

Þrír menn voru einnig handteknir árið 2007 og dæmdir í fimm til tólf ára fangelsi fyrir að skipuleggja hryðjuverk sem áttu að beinast að Jótlandspóstinum.

Sprengja sprakk á salerni

Árið 2007 var bóksalinn Said Mansour dæmdur í þriggja og hálfs árs fangelsi fyrir að hvetja til hryðjuverka í Danmörku.

Í september árið 2010 var Tsjetjeninn Lors Dukajev handtekinn eftir að hann hafði ætlað að gera sprengjuárás, líklega á skrifstofur danskra dagblaða. Hann særðist sjálfur þegar sprengja hans sprakk inni á salerni hótels í Kaupmannahöfn.

Í júní á síðasta ári var maður frá Sómalíu dæmdur í tíu ára fangelsi fyrir að hafa ætlað að ráðast á skopmyndateiknarann Kurt Westergaard með öxi og hníf að vopni.

Þrír menn voru hins vegar sýknaðir árið 2010 af áformum um að drepa Westergaard vegna ónægra sönnunargagna. Í október síðastliðnum kom bandaríska lögreglan upp um áform tveggja manna í Chicago um að gera árásir á Jótlandspóstinn í Kaupmannahöfn.

Í apríl síðastliðnum voru fimm ungir vinstri róttæklingar ákærðir fyrir nokkrar íkveikjur og áform um enn fleiri íkveikjur, sem í ákærunni voru taldar tilraunir til hryðjuverka, en mál þeirra tengdist skopmyndunum af Múhameð ekki.gudsteinn@frettabladid.is