Metfjöldi ferðamanna í september

Um 64.700 erlendir gestir fóru frá landinu um Leifsstöð í september sl. og er hér um að ræða langstærsta septembermánuð frá upphafi í fjölda þeirra. Í september í fyrra var fjöldi þeirra 51.600 og jafngildir þetta aukningu upp á heil 25,4% milli ára, sem er heldur meiri aukning en verið hefur á milli ára í mánuði hverjum það sem af er ári.

Fjallað er um málið í Morgunkorni greiningar Íslandsbanka en Ferðamálastofa birti fyrir helgina tölur sem ná yfir allar brottfarir frá landinu um Leifsstöð.

Brottfarir erlendra ferðamanna eru nú komnar upp í 537.000 á fyrstu níu mánuðum ársins, en á sama tímabili í fyrra var fjöldi þeirra 458.100. Jafngildir þetta aukningu upp á 17,2% milli ára.

„Í raun eru erlendir ferðamenn orðnir álíka margir nú á fyrstu níu mánuðum ársins og þeir voru allt árið í fyrra, en þá voru þeir 540.100. Líklegt er að brottfarir erlendra ferðamanna um Leifsstöð verði a.m.k. 620 þúsund á þessu ári, en sú tala fæst einfaldlega með því bæta við þeim 82.800 ferðamönnum sem fóru frá landinu um Leifsstöð á síðasta ársfjórðungi í fyrra," segir í Morgunkorninu.

„Ef aukningin á síðasta fjórðungi í ár frá sama tíma í fyrra verður hins vegar í takti við það sem hún hefur að jafnaði verið á þessu ári þá fer fjöldinn upp í 634 þúsund."

Hvað ferðir Íslendinga varðar kemur fram að alls héldu rúmlega 32.300 Íslendingar utan í september sl. samanborið við um 30.800 í fyrra. Jafngildir þetta aukningu upp á 4,9% á milli ára, sem er heldur minni aukning en hefur að jafnaði verið á árinu. Sé tekið mið af fyrstu níu mánuðum ársins þá eru brottfarir Íslendinga um Leifsstöð um 275.200 talsins samanborið við 260.200 á sama tímabili í fyrra, og hefur þeim því fjölgað um 5,8% á milli ára.

Sé árið í ár borið saman við árið 2009, þegar áhrifin af hruninu voru hvað mest, hefur utanlandsferðum landans fjölgað um heil 41,8%, en það ár héldu einungis 194.100 Íslendingar erlendis á fyrstu níu mánuðum ársins. Eðlilega er hluti af skýringunni að fjárhagsleg staða heimila er almennt betri nú en þá og óvissan minni.