Aðeins ein verslun seldi unglingi sígarettur

Um miðjan nóvember stóð forvarnarfulltrúi Hafnarfjarðar fyrir könnun á því hvort unglingar gætu keypt sígarettur á sölustöðum tóbaks í Hafnarfirði. Farið var á 16 sölustaði og gátu unglingarnir keypt sígarettur á einum stað.

Tveir unglingar úr 10. bekk fóru á sölustaði undir eftirliti starfsmanna Hafnarfjarðarbæjar og reyndu að kaupa sígarettur. Einungis einn sölustaður af 16 seldi unglingunum sígarettur Ekki var farið inn á staði með vínveitingaleyfi þar sem tóbak er selt. Frekari upplýsingar úr könnuninni eru sendar Heilbrigðiseftirliti Kópavogs- og Hafnarfjarðarsvæðisins þar sem unnið verður úr þeim eins og lög gera ráð fyrir.

Sölustaðnum er seldi börnunum tóbak verður einnig send ábending frá forvarnarfulltrúa. Búast má við því að sá staður sem seldi börnum tóbak fái áminningu frá heilbrigðiseftirliti eins og kveður á um í lögum um tóbaksvarnir.

Síðustu misseri hafa söluaðilar sett sér stöðugt skýrari reglur sem tryggja að aldurstakmörk séu virt. Hafnarfjarðarbær hefur aukið tíðni kannana og veitt sölustöðum stöðugt aðhald. Meirihluti sölustaða í Hafnarfirði hefur gert sérstakt samkomulag við forvarnafulltrúann sem miðar að því að leita allra leiða til að koma í veg fyrir sölu tóbaks til barna. Þessi könnun skilar langbestu niðurstöðu sem sést hefur síðustu ár. Markmiðið er að engin sölustaður selji börnum tóbak því mun forvarnafulltrúi í umboði Fjölskylduráðs Hafnarfjarðar halda áfram með þessar kannanir.