Tugir milljarða í jarðgöng næstu árin

Alþingi gerði ýmsar breytingar á samgönguáætlun sem samþykkt var í gær. Norðfjarðargöngum verður flýtt og fé sett í rannsóknir á Seyðisfjarðargöngum. 2,3 milljarðar fara í nýjan Herjólf og Landeyjahöfn. Bora á fjölda jarðganga.

Alþingismenn samþykktu fjögurra ára og tólf ára samgönguáætlanir í gær. Þær voru samþykktar samhljóða, 43 þingmenn greiddu þeim atkvæði sitt. Ýmsar breytingar voru gerðar á frumvörpum ráðherra og komu flestar frá meirihluta umhverfis- og samgöngunefndar.

Þá var samþykkt breytingartillaga átta þingmanna Norðausturkjördæmis um að miða rannsóknum og undirbúningi Seyðisfjarðarganga þannig að hægt sé að hefja framkvæmdir við þau samhliða Norðfjarðar- og Dýrafjarðargöngum.

Framkvæmdum við Norðfjarðargöng verður flýtt og munu þær hefjast á næsta ári. Settir verða 1,2 milljarðar í verkefnið þá og 2,5 árið 2014. Það verður því mikið um gangaboranir á næstunni, því Alþingi samþykkti nýverið heimild til fjármálaráðherra um lán vegna Vaðlaheiðarganga, en þau göng verða tekin út fyrir samgönguáætlun.

Við þetta bætist að í langtímaáætluninni er gert ráð fyrir að Norðfjarðargöngum verði lokið á öðru fjögurra ára tímabili áætlunarinnar, með alls 6,8 milljarða króna framlagi. Í framhaldi af því verða lagðir sex milljarðar króna í önnur jarðgöng. Þá verður framkvæmdum við Dýrafjarðargöng flýtt og þeim lokið 2018.

Fé til jarðganga næstu árin hleypur því á tugum milljarða.

Á meðal breytinga sem nefndarmeirihlutinn lagði til var að verja 2,3 milljörðum króna til uppbyggingar nýs Herjólfs og til framkvæmda við Landeyjahöfn, einum milljarði árið 2013 og 1,3 milljörðum árið 2014.

Af þessu fé er 440 milljónum króna varið í hlutafjárframlag til hlutafélags um kaup á nýrri ferju með þátttöku Vestmannaeyjabæjar, 60 milljónum króna til þarfagreiningar, hönnunar og tankprófana á nýrri ferju og 1.800 milljónum í framkvæmdir við Landeyjahöfn.

kolbeinn@frettabladid.is