Alþingi greiðir líkamsrækt fyrir þingmenn

Alþingismenn munu fá greiddan ýmsan kostnað, svo sem við kaup á gleraugum eða heyrnartækjum, krabbameinsleit, líkamsrækt og fleira, samkvæmt frumvarpi að nýjum þingskapalögum sem samþykkt voru í gærkvöld. Í greinargerð með frumvarpinu segir að alþingismenn fái með þessu rétt sem er sambærilegur rétti embættismanna. Jafnframt felur þetta ákvæði í sér rétt alþingismanna til fæðingarstyrks eins og á við um embættismenn. Er fyrirhugað að forsætisnefnd Alþingis setji nánari reglur um hann.



Viðskiptablaðið greinir frá því að Mörður Árnason, þingmaður Samfylkingarinnar, gerði athugasemd í þingumræðum um málið í gærkvöldi og sagði að ekkert mat lægi fyrir um kostnað vegna þessa. Á almennum vinnumarkaði legðu atvinnurekendur og launþegar framlög í sjóði á vegum stéttarfélaga sem kæmu til móts við kostnað félagsmanna. Hins vegar stæði ekki til að stofna sérstakan sjóð á Alþingi heldur ætti ríkissjóður að mæta öllum kostnaði.

Birgir Ármannsson, sem flutti málið í fjarveru Árna Þórs Sigurðssonar, þingmanns Vinstri grænna og formanns þingskapanefndar, sagði þennan lið fela í sér óverulegan kostnað.