Ásmundur: "Hreinlega skil ekki hvað gerðist"

Ásmundur Friðriksson, sem rekinn var úr stóli bæjarstjóra í Garði í kvöld, segir að uppsögn sín hafi ekkert að gera með hótanir sem bárust Kolfinnu Magnúsdóttur, bæjarfulltrúa í Garði. Kolfinna sleit meirihlutasamstarfi D-listans og gekk til liðs við N-listann um síðustu helgi. Stuttu eftir það var Kolfinnu hótað líkamsmeiðingum.

„Þessar hótanir eru bara eitthvað rugl sem enginn í okkar hópi kannast við," segir Ásmundur.

Aðspurður um ástæður uppsagnarinnar segir Ásmundur augljóst að nýr meirihluti í Garði hafi viljað losa sig við sitjandi bæjarstjóra. „Kolfinna gekk til liðs við minnihlutann," segir Ásmundur. „Henni hefur greinilega verið í nöp við bæjarstjórann."

Þá segir Ásmundur að uppsögnin hafi komið honum á óvart en hann las upphaflega um það á netinu að til stæði að segja honum upp. Hann segir að samstarf sitt og Kolfinnu hafi verið árangursríkt.

„Ég hreinlega skil ekki hvað gerðist. Við ræddum saman eftir bæjarstjórnarfundinn í kvöld. Þar sagði hún mér að ég hefði átt að finna það á mér að þetta færi svona," segir Ásmundur.

Talið er að skólamál liggi til grundvallar valdaskiptunum í Garði. Í skýrslu sem mennta- og menningarmálaráðuneytið lét vinna um Gerðaskóla kemur meðal annars fram að pólitískar deilur hafi haft neikvæð áhrif á skólastarfið.

„Kolfinna situr nú í skólanefnd þar sem fjallað er um þessi mál," segir Ásmundur. „Og af þeim 21 fundi sem haldinn hefur verið í nefndinni hefur hún aldrei verið með bókanir eða lýst yfir andstöðu við það sem við höfum verið að gera þar."

„Ég hreinlega skil ekki hvað gerðist. En þetta er búið og gert. Það er búið að reka mig úr vinnunni og þessi fíla bæjarfulltrúa mun kosta bæinn mikið."