Óttast afleiðingar veiðigjalda

Fulltrúar Vinnslustöðvarinnar og Ísfélagsins í eyjum óttast að talsmenn veiðigjalda geri sér ekki grein fyrir því hve þungt þau munu leggjast á Vestmannaeyjar. Útreikningar þeirra sýni að gjöldin muni nema 2,2 milljöðrum króna á næsta ári og leiða til hruns á uppbyggingastarfi síðustu ár.

Sindri Viðarsson, sviðsstjóri uppsjávarsviðs Vinnslustöðvarinnar, segir að til samanburðar megi nefna að útgjöld alls bæjarfélagsins hafi í fyrra numið 3,5 milljörðum. Sindri segir þrjá vonda kosti blasa við.

„Ef útgerðin á að lifa er þrennt í stöðunni. Við gætum breytt launum, það er að segja, lækkað laun, minnkað afskriftir skipa og það gerum við bara með því endurnýja ekki skipin þannig þau verða eldri og lélegri og við getum minnkað vexti eins og við erum búin að gera á Vinnslustöðinni með því segja upp á einu skipi, setja skipið á söluskrá og greiða niður skuldir. Þetta eru einu færu leiðirnar til að bregðast við þessum vanda og við stórlega efumst um að það sé nóg," segir Sindri.

Sindri óttast að eftir uppbyggingar ár í Vestmannaeyjum undanfarin ár blasi niðurskurður aftur við. Í sama streng tekur Hörður Orri Grettisson, forstöðumaður hagdeildar Ísfélagsins.

„Um 80 til 90 prósent starfa í Vestmannaeyjum eru háð sjávarútvegi. Það gengur allt út á sjávarútveg hér, það er bara þannig. Það er ekki langt síðan hann gekk ekki nægilega vel og þá var ástandið ekki glæsilegt hér — fasteignaverðið hrundi og það var fækkun hér ár eftir ár. Það eru bara tvö til þrjú ár síðan þessi þróun breyttist og fasteignaverðið hækkaði og atvinnuástandið varð gott," segir Hörður Orri.