Innlent

Allir vinnudagar hefjast á öryggisandakt

Kristján Már Unnarsson skrifar
Allir vinnudagar á Búðarhálsi byrja á því að starfsmenn koma saman á svokallaða öryggisandakt. Með aðferðum sem þessum hefur tekist að koma í veg fyrir alvarleg vinnuslys á einum hættulegasta vinnustað landsins.

Þarna þurfa menn að varast tröllaukna trukka á fleygiferð, bakkandi steypubíla, stóreflis hjólaskóflur mokandi fram og til baka, oddhvassa gaffallyftara sem skjótast fram hjá og himinháa krana sveiflandi þungum stykkjum allt um kring. Þarna eru djúpir skurðir og há mannvirki, og því miklar fallhæðir til að varast.

Í viðtali í fréttum Stöðvar 2 lýsir Erlingur Jónasson, gæða- og öryggisstjóri Ístaks, hvernig nú er tekið fastar á öryggismálum en áður. Menn telja sig sjá árangurinn í tölum, eins og heyra má í viðtalinu sem fylgir fréttinni. Þegar um 700 þúsund vinnustundir eru að baki hafa aðeins orðið þrjú slys sem kostað hafa fjarveru frá vinnu, - og ekkert þeirra alvarlegt.


Tengdar fréttir

Nýr foss orðinn til við Hrauneyjar

Tilkomumikill foss, og einn sá aflmesti á landinu, hefur myndast neðan Hrauneyjafossvirkjunar vegna virkjanaframkvæmda við Búðarháls. Hann verður þó aðeins sýnilegur í eitt ár. Hann er meira en tvöfalt hærri en Urriðafoss, fallhæðin er um fimmtán metrar, og þarna fossa niður yfir 150 rúmmetrar vatns á hverri einustu sekúndu.

Vinnan á Búðarhálsi í hámarki

Yfir þrjúhundruð manns eru að störfum á hálendinu við smíði Búðarhálsvirkjunar þar sem framkvæmdir eru nú í hámarki. Búið er að steypa upp stöðvarhúsið og flest bendir til þess að virkjunin verði kláruð á tilsettum tíma. Búðarháls er langstærsti nýbyggingarstaður á Íslandi um þessar mundir, þarna starfa um 310 manns í sumar, langflestir á vegum aðalverktakans, Ístaks, en þorri starfsmanna eru Íslendingar.

Mest lesið


Fleiri fréttir

Sjá meira


×

Mest lesið