Vinnan á Búðarhálsi í hámarki

Yfir þrjúhundruð manns eru að störfum á hálendinu við smíði Búðarhálsvirkjunar þar sem framkvæmdir eru nú í hámarki. Búið er að steypa upp stöðvarhúsið og flest bendir til þess að virkjunin verði kláruð á tilsettum tíma.

Búðarháls er langstærsti nýbyggingarstaður á Íslandi um þessar mundir, þarna starfa um 310 manns í sumar, langflestir á vegum aðalverktakans, Ístaks, en þorri starfsmanna eru Íslendingar. Helstu undirverktakar eru Suðurverk í stíflugerð, Aflbinding í járnabindingu, og Tucon frá Slóvakíu, sem grefur jarðgöng. Og eins og jafnan við stórvirkjanir, þá eru þetta tröllauknar framkvæmdir.

Dagur Georgsson, aðstoðarstaðarstjóri Landsvirkjunar, segir í viðtali í fréttum Stöðvar 2 að framkvæmdirnar séu nú sennilega mjög nálægt hámarki. Það sé þó mismunandi eftir verkþáttum. Jarðvinna og mannvirkjagerð séu í fullum gangi og í hámarki meðan aðrir verkþættir eigi eftir að koma inn, eins og uppsetning vél- og rafbúnaðar, sem brátt fer að hefjast nú þegar búið sé að steypa upp stöðvarhúsið. Húsinu verði lokað síðsumars eða í haust.

Þá stefni í að menn slái í gegn í jarðgöngunum fyrir áramót en þarna er verið að grafa fjögurra kílómetra aðrennslisgöng, 2,7 kílómetrar eru komnir af efri hlutanum, sá neðri verður grafinn á eftir, en þarna inni glíma verktakar við erfið jarðlög og vatnsleka. Dagur segir að það sé þó ekkert sem komið hafi stórvægilega á óvart.

Stíflugerð eru komin á fullt efir að hafa legið niðri í vetur en þarna rís á næstu mánuðum 1.100 metra löng og 25 metra há jarðvegsstífla við ármót Köldukvíslar og Tungnaár en þar mun frárennsli Hrauneyjafossvirkjunar mynda sjö ferkílómetra lón.

Að sögn Dags Georgssonar er verkið á áætlun og allar horfur á að virkjunin klárist á tilsettum tíma, fyrir árslok 2013.

Stofnkostnaður er áætlaður um 26 milljarðar króna. Miðað við það verð, sem Landsvirkjun hefur gefið út að hún treysti sér til að fá í nýjum orkusamningum til stóriðju, gæti verðmæti 585 gígavattstunda raforkuframleiðslu Búðarhálsvirkjunar numið yfir þremur milljörðum króna á ári. Það lítur því út fyrir að virkjunin verði fljót að borga sig upp.