Færri ráðnir án auglýsinga

Steingrímur J. Sigfússon, formaður Vinstri grænna, segir mjög hafa dregið úr ráðningum án auglýsinga hjá ríkinu. Fréttablaðið greindi frá bréfi Umboðsmanns Alþingis, þar sem hann hvatti til að slíkum ráðningum yrði fækkað og sagði það myndu efla traust á ríkisvaldinu.

„Það verður að viðurkennast að það kom tímabil þar sem aðstæður voru þannig að menn urðu að grípa til slíkra ráðninga, af óviðráðanlegum aðstæðum, í tengslum við hrunið og upp úr því. Það hefur hins vegar snardregið úr þessu aftur," segir Steingrímur.

Hann segir mikilvægt að hafa í heiðri reglur um auglýsingu starfa. „Um leið og menn eru komnir í jafnvægisaðstæður er engin afsökun fyrir hinu."- kóp