Kviknaði í tveimur bílum við íbúðarhús

Eldur kom upp í tveimur bílum við Gerðhamra 26 í Grafarvogi um eitt leytið í dag. Bílarnir voru báðir utandyra og tókst að ráða niðurlögum eldsins áður en hann barst í nærlæg íbúðarhús. Bílarnir eru þó báðir ónýtir eftir eldsvoðann. Annar þeirra er gamall Willys og hinn nýlegur fólksbíll.

Slökkviliðinu á höfuðborgarsvæðinu bárust fjölmargar tilkynningar vegna eldsvoðans og sendi allt tiltækt lið á svæðið. Þegar þangað var komið reyndist bruninn ekki jafnalvarlegur og óttast var í fyrstu.

Íbúar á svæðinu höfðu hafið slökkvistörf með mjög takmörkuðum árangri áður en slökkviliðið kom á svæðið. Þegar slökkviliðið mætti gekk hins vegar greiðlega að slökkva eldinn.

Ekki er vitað hvað olli eldsvoðanum en sem stendur lítur út fyrir að ekki hafi verið um íkveikju að ræða.