Bannað að nefna eftir Aðalvík

Ekki er leyfilegt að nefna barn sitt eftir hinni fögru Aðalvík á Hornströndum þar sem mannanafnanefnd hefur hafnað beiðni um að nafnið Aðalvíkingur verði fært í mannanafnaskrá.

Frá þessu greinir vestfirski fréttavefurinn bb.is eða Bæjarins besta í dag.

Var nafninu hafnað þar sem það þótti brjóta í bág við íslenskt málkerfi. „Eiginnafnið Aðalvíkingur (kk.) er dregið af staðarheitinu Aðalvík og má nota um íbúa staðarins á sama hátt og orðin Reykvíkingur og Húsvíkingur. Það er ekki í samræmi við málhefð að mynda eiginnöfn á þennan hátt," segir í úrskurði mannanafnanefndar.