Steingrímur vill skattaívilnanir fyrir sjómenn í framtíðinni

Steingrímur J. Sigfússon, sjávarútvegsráðherra, sagði í hátíðarræðu sinni í tilefni af sjómannadeginum í dag að hann vildi ekki varpa frekari skugga á hátíðarhöldin með því að ræða um harðvítug átök LÍÚ og ríkisstjórnarinnar. „Það kynni ég að hafa látið eftir mér ef mál hefðu ekki skipast með þeim hætti sem raun bar vitni í gær," sagði Steingrímur og vitnaði þar til mótmælaaðgerða LÍÚ en nær allur skipafloti Íslendinga mun verða bundin við bryggju í næstu viku í svokölluðu neyðarkalli útgerðarmanna.

Steingrímur sagði að í ljósi þess að í dag er hátíðisdagur sjómanna, lögbundnir frídagar þeirra og samvera með fjölskyldum í landi standa yfir, vildi hann fyrst og fremst nálgast málin frá þeim sjónarhóli sem að sjómönnum snýr og fullvissa sjómenn um að engu í þessum málum væri stefnt gegn hagsmunum sjómanna.

„Þessi mál snúast ekki um að veiða minna af fiski eða skerða kjör eða skiptahlutföll sjómanna. Þvert á móti stendur til að reyna eftir því sem slíkt er hægt í gegn um lög um stjórn fiskveiða að treysta betur umgjörð um kjaramál sjómanna og reyna að undirbyggja að allur lögskráðum sjómönnum skuli tryggðir kjarasamningar og einhver umsamin lágmarkskjör," sagði Steingrímur svo.

Þá tók Steingrímur fram að það hafi ekki verið gert með gleði að afnema sjómannaafsláttinn. Hann bætti við að hann væri þeirra skoðunar að þegar eðlilegri aðstæður væru uppi í ríkisfjármálum, þá sæi hann fyrir sér sérstakar skattalegar ívilnanir fyrir sjómenn.

„Hvort það yrði þá aftur í formi einhvers konar sjómannafrádráttar eða skattalegra ívilnana sem tengdust fæðis- eða fatapeningum eða á öðru formi læt ég ósagt og tek fram að hér tala ég fyrir mig en ekki hönd annarra," sagði Steingrímur.

Hann lauk svo ræðu sinni á eftirfarandi orðum: „Það er gæfa að fæðast Íslendingur, þannig er það og þannig skal það verða. Og hin gæfusama þjóð stendur í þakkarskuld við eina stétt manna umfram flestar aðrar. Í dag er þeirra hátíð."

Hér má lesa ræðuna í heild sinni.