Íslenskur snekkjugerðarmaður ákærður fyrir skjalafals í Dúbaí

Rétt rúmlega fertugur snekkjusmiður frá Íslandi hefur verið ákærður fyrir skjalafals í Sameinuðu arabísku furstadæmunum en hann gengur nú laus gegn tryggingu sem hljóðar upp á tæplega tvær milljónir íslenskrar króna.

Það er fréttavefurinn The National sem greinir frá málinu í dag en þar kemur fram að maðurinn, sem er ekki nefndur á nafn í greininni, hafi falsað skjalið þegar hann höfðaði dómsmál gegn manni frá furstadæminu Abu Dhabi, sem hann smíðaði snekkju fyrir.

Málsatvik eru dálítið sérkennileg en svo virðist vera sem íslenski maðurinn hafi orðið fórnarlamb óheiðarlegra viðskiptahátta heimamanns. Þannig leitaði sá íslenski eftir fjárfesti til þess að setja á fót fyrirtæki sem smíðar lúxussnekkjur. Heimamaðurinn sagðist hafa áhuga á að vera bakhjarl í fyrirtækinu en með því skilyrði að hann smíðaði snekkju handa honum.

Sem og Íslendingurinn gerði. Heimamaðurinn fékk snekkjuna afhenta samkvæmt blaðinu en sveik aftur á móti samkomulagið og greiddi ekkert fyrir snekkjuna og neitaði að auki að skila henni þegar þess var krafist.

Íslendingurinn höfðaði því mál á hendur manninum árið 2010. Úr varð að hann vann málið og var heimamanninum gert að greiða Íslendingnum um 130 milljónir króna.

Það er þá sem málið tekur aðra og sérkennilega beygju, því nú er Íslendingurinn grunaður um að hafa falsað dómsskjal og lagt fyrir dóminn í fyrrnefndu máli. Því er Íslendingurinn sakaður um að hafa haft áhrif málið með ólögmætum hætti og sætir ákæru vegna þessa.

Málið var tekið fyrir hjá dómstólum í dag en Íslendingurinn var látinn laus gegn tryggingu upp á 1,7 milljónir króna. Þá þurfti hann einnig að láta vegabréfið af hendi en þinghaldi hefur verið frestað til 29. september.