Björgunarsveitarmaður til hjálpar vegna Bopha

Lárus Björnsson úr Björgunarsveit Hafnarfjarðar og Íslensku alþjóðabjörgunarsveitinni (ÍA) er nú á leið til Filippseyja þar sem fellibylurinn Bopha gerði mikinn usla í síðustu viku.

Lárus verður hluti af viðbragðsteymi Nethope, sem eru regnhlífarsamtök 37 stærstu hjálparsamtaka heimsins og sérhæfa sig í fjarskiptum og tölvutækni á skaðasvæðum. Mun teymið sjá um að koma fyrstu fjarskiptatækjunum á vettvang auk þess að framkvæma þarfagreiningu og meta aðstæður út frá fjarskiptasjónarmiði á þeim svæðum er verst urðu úti.

Eftir fellibylinn hefur allt rafmagns- og fjarskiptakerfi á svæðinu legið niðri og reiknað er með að það geti tekið allt að einn mánuð að koma því aftur í gang. Fjarskipti eru mikilvæg í neyðaraðstæðum, enda undirstaða góðrar samhæfingar og stjórnunar aðgerða.

Lárus, sem starfar hjá Slökkviliði höfuðborgarsvæðisins, er hluti af fjarskiptahópi Björgunarsveitar Hafnarfjarðar sem einnig sinnir fjarskiptamálum Íslensku alþjóðabjörgunarsveitarinnar.

Á Filippseyjum urðu yfir 5 milljón mans fyrir barðinu á fellibylnum Bopha þegar hann fór yfir landið í síðustu viku.

Um 740 manns hafa þegar fundist látnir og tæplega 900 er enn saknað. Milli 250-350 þúsund manns hafa misst heimili sín og það mun taka marga mánuði og jafnvel ár að byggja aftur upp á þeim svæðum sem verst urðu úti.