Stuðningsgrein: Forval Samfylkingarinnar 2012

Það eru tæp 40 ár liðin frá því undirritaður ásamt öðrum ungum áhugamönnum um stjórnmál hittumst og ræddum um nauðsyn breytinga á vali fulltrúa til þings og bæjarstjórna. Einkum var okkur ofarlega í huga að brjóta upp flokksræðið í íslenskum stjórnmálum. Ýmislegt bar á góma, skoðuðum við einkum kosningakerfi og höfðum þá í huga persónuval við kosningar. Lítið var okkur þá ágengt enda má segja að prófkjör hafi að hluta til verið lausn á hugmyndum okkar.

Prófkjörin eru takmörkuð lausn, best að hafa möguleikann að raða frambjóðendum á lista, og velja þannig fulltrúa til að fara með umboð okkar til sveitar- og landsstjórnar. Ekkert varð af því að þessi hópur formaði endanlegar hugmyndir. Síðar þegar við ungir jafnaðarmenn ræddum ýmis réttlætismál svo sem þjóðareign auðlinda varð okkur ljóst að lausn auðlindamála sem og annarra réttlætismála svo sem kosningamála fengist aðeins með nýrri stjórnarskrá. Hugmynd okkar var að ná saman Þjóðfundi sem formaði tillögur að nýrri stjórnarskrá sem Alþingi notaði til grundvallar. Nú er svo komið að lokaáfangi er fram undan, Alþingi hefur fengið tillögu sem þjóðin hefur samþykkt. Nú reynir á Alþingi að vinna endanlega úr hugmyndunum og leggja þær svo fyrir þjóðina til samþykktar í næstu kosningum.

Að öðrum ólöstuðum þá ber að þakka Bandalagi jafnaðarmanna og Þjóðvaka fyrir þrautseigju við að þoka þessu máli öllu áfram. Árangrinum ber einkum að þakka tveimur kjarnakonum sem farið hafa fyrir málinu á Alþingi, þeim Jóhönnu Sigurðardóttir forsætisráðherra og Valgerði Bjarnadóttir, formanni stjórnskipunar- og eftirlitsnefndar Alþingis. Jóhanna hverfur af þingi við næstu kosningar. Valgerður hins vegar sækist eftir að leiða lista Samfylkingarinnar í Reykjavík við næstu alþingiskosningar.

Öflugur stuðningur við Valgerði í forvali Samfylkingarinnar er viðurkenningarvottur fyrir gott starf og jafnframt hvatning til hennar að ljúka málinu þegar það kemur til kasta nýs þings að kosningum loknum.

Samfylkingarfólk í Reykjavík nýtur þeirra forréttinda sem aðrir landsmenn hafa ekki að geta í forvali sýnt þakklæti sitt og jafnframt tryggt að hugsjónin um aukið réttlæti í þjóðfélaginu fái til forystu konu sem er traustsins verð.