Fram hótar málssókn standi borgin ekki við uppbyggingu

„Ég lít svo á að þetta séu hrein og klár svik við Knattspyrnufélagið Fram og íbúa hverfisins,“ segir Ólafur Arnarson, formaður Knattspyrnufélagsins Fram um áætlun borgarstjórnar um minni uppbyggingu í Úlfarsárdal en ráðgert var.

Fréttablaðið greindi frá því í gær að í stað 18 þúsund manna byggðar í dalnum væri nú gert ráð fyrir 2.500 til 3.000 manna byggð. Þá er áformað að reisa sundlaug og íþróttahús í hverfinu, auk nýs samþætts leik- og grunnskóla.

Reykjavíkurborg og Fram undirrituðu samning 1. maí 2008 um að félagið flytti í Úlfarsárdal. Ólafur segir að með honum hafi borgin lofað uppbyggingu fyrir 2.750 milljónir króna á þávirði, sem í dag nema 3.632 milljónum uppfærðum að verðlagsþróun. Eftir hrun var gerður viðaukasamningur og samkvæmt honum ráðist í framkvæmdir við gervigrasvöll, æfingavelli og bílastæði fyrir 500 milljónir króna. Ólafur segir að félagið eigi ekki annars úrkosti en að leita réttar síns, verði ekki staðið við samninginn.

„Þá er bara dómstólaleiðin eftir. Við erum með samninginn í höndunum og verðum að fá úr því skorið hvort hann standist eða ekki. Við teljum að við höfum það með okkur að það er búið að lofa okkur vissum hlutum. Svo má ekki gleyma því að Reykjavíkurborg er líka að fá verðmætt byggingarland í Safamýri.“

Ólafur segir Fram hafa fullan hug á að flytja í Úlfarsárdalinn, jafnvel þó hverfið verði ekki jafn fjölmennt og fyrirhugað var. Félagið verði hins vegar að fá aðstöðu sem dugi félögum þess til að iðka sínar íþróttir.

„Fram getur aldrei farið þarna upp eftir til þess að sinna íþróttastarfi þar á þessum forsendum sem Reykjavíkurborg er að búa til. Það verður aldrei hægt og það segir sig sjálft,“ segir Ólafur og bendir á að félagið eigi, samkvæmt áætlun, áfram að leika heimaleiki sína í Laugardalnum.

Fram, Íbúasamtök Grafarholts og Íbúasamtök Úlfarsárdals samþykktu ályktun eftir að þeim voru kynnt áformin fyrir helgi. Þar eru borgaryfirvöld krafin um samvinnu, enda sé um mikið hagsmunamál að ræða. Þá er þess krafist að „borgaryfirvöld standi við gildandi skipulag og gerða samninga og geri skurk í uppbyggingu hverfisins“.

kolbeinn@frettabladid.is