Umferðarslysum hefur snarfækkað

Samkvæmt tölum lögreglu hefur slysum í umferð, þar sem meiðsl verða á vegfarendum, fækkað mikið síðustu ár. Þannig hefur slysum fækkað á höfuðborgarsvæðinu um 10% fyrstu ellefu mánuði þessa árs borið saman við sama tímabil í fyrra og um 39% frá árinu 2008.

Þegar skoðaðar eru tölur Umferðarstofu frá 2008 til 2011 sem sýna orsök umferðarslysa, má sjá að slysum er tengjast áhættuhegðun í umferð fer fækkandi. Þar má nefna slys sem rakin eru til aksturs á móti rauðu ljósi, brots gegn stöðvunarskyldu, brots gegn biðskyldu, ölvunaraksturs, fíkniefnaaksturs, of stutts bils milli bifreiða og ógætilegs framúraksturs.

Þá er tölfræðilegur samanburður við Norðurlöndin síðustu ár síður en svo óhagstæður fyrir umferðarmenningu hér á landi. Svo virðist því sem tillitssemi ökumanna í umferð sé að aukast, þeir aki gætilegar en áður og af meiri árvekni og ábyrgð. Lögreglan segir það því vera mat sitt að umferðarmenning hér á landi hafi farið batnandi á síðustu árum og allar líkur séu á að hægt sé að ná enn betri árangri í fækkun slysa á þeim næstu.