Sagnfræðirannsóknir í brennidepli

Íslenska söguþingið verður sett í kvöld og mun standa fram á sunnudag í húsakynnum Háskóla Íslands.

Þetta er í fjórða sinn sem íslenska söguþingið er haldið, en síðast var það haldið árið 2006.

Að því er segir í tilkynningu verða þar meðal annars kynntar niðurstöður í nýjum íslenskum rannsóknum í sagnfræði auk þess sem staða og framtíð íslenskra rannsókna verður til umræðu.

Dagskráin er mjög fjölbreytt þar sem yfir 90 fyrirlestrar verða í boði. Þá hefur Sagnfræðistofnun Háskóla Íslands boðið þremur heimsþekktum sagnfræðingum til þingsins, þeim Lindu Colley, prófessor við Princeton-háskóla, David Cannadine, prófessor við Princeton-háskóla, og Geoff Eley, prófessor við háskólann í Michigan í Bandaríkjunum.

Auk þess munu tveir erlendir fyrirlesarar, þær Anne Katherine Isaacs, prófessor við háskólann í Písa, og Anne Deighton, prófessor við háskólann í Oxford, tala á opinni málstofu um Evrópumál, sem styrkt er af Evrópustofu.

Þingið verður sett kl. 17 í dag, en nánari upplýsingar um dagskrá og skráningu má finna inni á heimasíðu Reykjavíkurakademíunnar, Akademia.is.- þj