Rjúpu hefur fækkar um fjórðung milli ára

Rjúpu fækkar um nær allt land að því er fram kemur í talningu Náttúrufræðistofnunar Íslands í vor.

„Þetta fækkunarskeið hefur varað í tvö ár á Vestfjörðum, Norðurlandi og Austfjörðum og í þrjú ár á Suður-, Suðvestur- og Vesturlandi,“ segir í tilkynningu stofnunarinnar.

Séu öll svæði tekin saman nam meðalfækkun rjúpna fjórðungi milli áranna 2011 og 2012. Fram kemur að mat á veiðiþoli rjúpnastofnsins komi til með að liggja fyrir í ágúst í kjölfar mælinga á varpárangri rjúpna, afföllum 2011 til 2012 og veiði 2011. „Miðað við fyrri reynslu mun fækkunin halda áfram og rjúpnastofninn verða í lágmarki á árabilinu 2015 til 2018 og næsta hámark yrði 2020 til 2022.“

Fram kemur að stofninn sveiflist mikið af náttúrulegum orsökum. „Fyrri hluti 20. aldar einkenndist af mjög háum toppum í rjúpnahámörkum og var sá síðasti í þeirri röð árið 1955. Síðustu áratugi hefur hins vegar gætt langtímaleitni til fækkunar í stofninum.“

Rjúpnaveiði var bönnuð 2003 til 2005, en friðun var aflétt þá um haustið í kjölfar uppsveiflu í stofninum.

„Rjúpnaveiðar frá 2005 hafa verið takmarkaðar frá því sem var fyrr á árum og 2011 var veiðitíminn aðeins níu dagar.“

- óká