Segir laun sjómanna geta lækkað

Guðmundur Kristjánsson, útgerðarmaður í Brimi, segir að ræða verði laun sjómanna upp á nýtt verði fiskveiðistjórnarfrumvörp stjórnvalda að veruleika.

„Ef skip veiðir 10 fiska í dag þá taka sjómenn fjóra fiska og útgerð sex fiska. Ef ríkið ætlar að fara að taka marga fiska þá þarf að ræða skiptinguna upp á nýtt," segir Guðmundur og gefur þannig í skyn að laun sjómanna muni lækka.

Guðmundur er á beinni línu á dv.is núna. Þar tekur hann við spurningum frá almenningi og svarar í stuttu máli.

Guðmundur segir skilning stjórnvalda á fjárfestingaþörf í sjávarútvegi takmarkaðan. Einnig hefur hann upplýst að ný skip kosti um 4,3 milljarða króna og útgerðarfyrirtæki muni ekki ráðast í slíkar fjárfestingar nema þau geti séð 15-20 ár fram í tímann.

Þegar skipafloti LÍÚ sigldi inn í Reykjavíkurhöfn í morgun voru þokulúðrar þeyttir. Spurður út í slíka „misnotkun á öryggistækjum" sagði hann að það væri „frískandi fyrir kaffi-latte liðið í 101 að vakna hressilega einn morguninn".