Sjómenn byrstu sig við mótmælendur

Smávægileg átök áttu sér stað á milli stríðandi fylkinga á mótmælum sjómanna og útvegsmanna á Austurvelli fyrir stundu. Þannig byrstu sjómenn sig við konu og Eirík Stefánsson, sem hrópuðu kröftuglega á meðan Árni Bjarnason, forseti Farmanna- og fiskimannasambands Íslands, hélt ræðu. Sjómenn byrstu sig við þau og ýttu við þeim.

Sjálfur sagði Árni að í hvert skipti sem hann færi á fund hitti hann fyrir Eirík. Hvatti hann því næst sjómenn til þess að þagga niður í þeim, var þá fagnað ógurlega. Þá mátti einnig heyrast hróp víða úr mannfjöldanum, en um 2000 manns eru á mótmælunum. Meðal annars mótmæli gegn útvegsmönnum, hópi sem styður kvótafrumvörp ríkisstjórnarinnar.

Árni sagði í ræðu sinni að kvótafrumvörpin yrðu skaðleg sjómönnum sem og landsmönnum öllum. Hann hvatti ríkisstjórnina til þess að draga þau til baka og endurskoða sáttaleiðina, sem hann taldi vænlegasta til þess að höggva á þann harða hnút sem deilan er komin í.

Hægt er að horfa á beina útsendingu hér.