Þurftu að bíða í flugvélinni í 40 stiga hita í þrjá tíma

Strandaglópur á vegum Icelandair í Denver segist hafa þurft að sitja í fjörutíu stiga hita í flugvélinn í þrjá tíma áður en honum var vísað frá borði vegna vélarbilunar. Hann telur sig heppinn að hafa fengið pláss á hótelinu sem fólkinu var vísað á.

Þór Kristjánsson er búinn að vera í nokkurra daga skemmtiferð í Bandaríkjunum. Erindið var meðal annars að sækja barnabarnið hans sem hefur verið við nám í Texas. Ætlunin var að snúa heim í gær frá Denver með Icelandair.

„Við vorum öll komin út í vél og látin bíða þar í þrjá klukkutíma í fjörutíu stiga hita. Á meðan sagði flugmaðurinn okkur tvisvar að það væri einhver leki í hjólastellinu og að þeir væru að leita að orsökum. Eftir þessa þrjá tíma segir hann að þetta sé meiri viðgerð en þeir héldu og að við verðum að fara frá borði, að við förum á hótel og það verði flogið á sama tíma deginum eftir," segir Þór.

Hann segir að þeim hafi því næst verið vísað frá borði og fengið beiðnir til að fara á hótel frá starfsmönnum Lufthansa. Alls hafi þetta verið á annað hundrað manns, mestmegnis útlendingar.

„Staðan er sú núna að við fengum beiðni á tveggja stjörnu hótel og allt liðið var sent með beiðni hingað. En það er fullt af fólki sem fékk ekki inni hérna einu sinni því það var allt orðið fullt. Það endaði með því að maður sá fólk hérna ráfandi um með töskur og reyna komast inn á önnur hótel, en þau vildu ekki beiðnirnar frá þessu fólki. Þetta var hálf fáránlegt allt saman."

Þór er afar ósáttur við að enginn starfsmaður frá Icelandair hafi verið viðskiptavinunum innan handar í Denver.

Samkvæmt upplýsingum frá Icelandair er seinkunin vegna vélarbilunar. Áætluð koma til Keflavíkur er á sjöunda tímanum í fyrramálið.