Haldið sofandi í öndunarvél eftir sex metra fall

Konu á þrítugsaldri, sem stökk út úr brennandi húsi í Borgarnesi rétt fyrir klukkan fjögur í nótt, er haldið sofandi í öndunarvél á gjörgæsludeild Landspítalans, samkvæmt upplýsingum frá vakthafandi lækni. Glugginn er á rishæð hússins og féll hún um sex metra til jarðar.

Hún hlaut mikla áverka, meðal annars á höfði og missti meðvitund. Þyrla Landhelgisgæslunnar kom til móts við sjúkrabíl við Hvalfjarðargöng og flutti hana á spítalann.

Tveir aðrir íbúar hússins sluppu ómeiddir út.

Lögreglan rannsakar nú eldsupptök.