Kannað verði hvort Egill hafi verið hafður fyrir rangri sök

Ríkissaksóknari hefur fyrirskipað lögreglu að rannsaka hvort Egill Einarsson hafi verið hafður fyrir röngum sakargiftum og hvort framburður vitna í máli hans hafi verið rangur. Lögreglan hafði áður vísað málinu frá en Ríkissaksóknari fellst ekki á það.

Egill Einarsson og kærasta hans voru í fyrra kærð fyrir kynferðisbrot gegn ungri konu. Lögreglan rannsakaði málið og þann 15. júní síðastliðinn tilkynnti Ríkissaksóknari að málið hefði verið fellt niður þar sem ekki væri nægilega líklegt að það myndi leiða til sakfellingar. Egill hefur haldið fram sakleysi sínu og skömmu eftir að málið var látið niður falla, 3. júlí síðastliðinn, lögðu Egill og unnusta hans fram kæru á hendur konunni sem hafði borið þau þessum sökum.

Þau óskuðu einnig eftir því að rannsakað yrði hvort óeðlilegum þrýstingi eða pólitískum völdum eða áhrifum hefði verið beitt í málinu.

Lögreglan vísaði þessu máli frá þann 13. september síðastliðinn en í tölvupósti til málsaðila sagði lögreglustjóri að ekki þættu efni til að hefja rannsókn.

Þessu eru Ríkissaksóknari hins vegar ósammála.

Rökstuðningi embættisins sem fréttastofa hefur fengið afrit af segir: „Það er mat Ríkissaksóknara að efni séu til að hefja lögreglurannsókn í málinu í samræmi við fyrirmæli sem send verða lögreglustjóranum."

Niðurstaða saksóknara er semsagt sú að ákvörðun lögreglustjóra um að vísa kæru Egils Einarsson frá er felld úr gildi og það lagt fyrir lögreglustjóra að taka málið til rannsóknar.

Það skal hins vegar tekið fram að Ríkissaksóknari telur ekki tilefni til að rannsaka hvort pólitískum völdum eða áhrifum hafi verið beitt í málinu.