Skattar lækka í Kópavogi

Áhersla er lögð á lækkun skulda í tillögu meirihluta bæjarstjórnar Kópavogs að fjárhagsáætlun fyrirárið 2013. Fasteignagjöld af íbúðar- og atvinnuhúsnæði, vatnsskattur og sorphirðugjöld lækka í Kópavogi í upphafi næsta árs samkvæmt tillögunni.

„Er þetta í samræmi við stefnuyfirlýsingu meirihlutans um að fasteignagjöld á íbúðir og fyrirtæki og önnur gjöld verði endurskoðuð með lækkun í huga," segir Ármann Kr. Ólafsson, bæjarstjóri í Kópavogi. Með fjárhagsáætluninni sé tónninn gefinn og fyrstu skrefin tekin í átt að lækkun á skattbyrgði íbúa bæjarins.

Hér fyrir neðan má sjá breytingu gjalda.

Fasteignaskattur á íbúðarhúsnæði lækkar úr 0,32% í 0,29% (um 9,4)

Lóðarleiga atvinnuhúsnæðis lækkar úr 214,97 í 190,00 kr/m² (um 11,6%)

Fasteignaskattur á atvinnuhúsnæði lækkar úr 1,65% í 1,64% (um 0,6%)

Fasteignaskattur á hesthús lækkar úr 0,625% í 0,59% (um 5,6%)

Vatnsskattur lækkar úr 0,135% í 0,12% (um 11,1%)

Sorphirðugjald lækkar úr 23.300 kr. í 21.000 kr. (um 9,9%)

Gert er ráð fyrir að skuldahlutfall Kópavogsbæjar, það er, skuldir sveitarfélagsins deilt með rekstrartekjum, lækki úr 244 niður í 206 prósent. Samkvæmt lögum eiga sveitarfélög að vera búin að ná þessu hlutfalli niður fyrir 150 prósent fyrir 1. janúar 2023.

Rekstrarafgangur samstæðu Kópavogsbæjar verður 126 milljónir króna á næsta ári samkvæmt áætluninni og veltufé frá rekstri 2.860 milljónir.

„Fjárhagsáætlunin sýnir að Kópavogsbær er að takast að vinna hratt og vel úr þeim vanda sem skapaðist í kjölfar efnahagsáfallsins árið 2008 og mun betur heldur en raunsæir menn þorðu að vona en þar kemur til góður rekstur og sala lóða," segir Ármann.