Skemmtigarðurinn þykir bestur

Skemmtigarðurinn í Smáralind hlaut í gær verðlaun sem Besti innanhúss skemmtigarður heims árið 2012. Verðlaunin eru veitt árlega af IAAPA, alþjóðlegum samtökum skemmtigarða.

„Það var óvæntur heiður að fá þessi verðlaun og þau eru mun stærri við áttum von á. Það var gaman að standa við hlið verðlaunaþega frá Walt Disney, Sea World og annarra stærri garða og sannast kannski hið margkveðna að stærðin skiptir ekki alltaf máli,“ segir Eyþór Guðjónsson framkvæmdastjóri Skemmtigarðsins. Eyþór veitti verðlaununum viðtöku við hátíðlega athöfn í Orlandó ásamt Ingibjörgu Guðmundsdóttur og Sigurði Erni Eiríkssyni.

Keppt er í tveimur flokkum, annars vegar í flokki stórra skemmtigarða og hins vegar í flokki smærri garða. Að sögn Eyþórs er nokkuð langt um liðið frá því að evrópskur skemmtigarður hlaut umrædd verðlaun. IAAPA-samtökin voru stofnuð árið 1918 og innan samtakanna má finna yfir fjögur þúsund skemmtigarða í 93 löndum.

En hvaða þýðingu hafa verðlaunin fyrir Eyþór og samstarfsfólk hans?

„Þetta hvetur okkur til áframhaldandi góðra verka. Við erum ánægðust með það að þarna kemur hlutlaus aðili í Skemmtigarðinn og telur hann bestan í heimi. Það er frábært að fá þessa viðurkenningu. Við tökum þessu af hógværð og erum fyrst og fremst þakklát.“

Þegar hann er að lokum inntur eftir því hvort aðstandendur Skemmtigarðsins ætli að fagna þessu góða gengi segir hann hlæjandi: „Við förum kannski út að borða hér í Orlandó og gefum hvert öðru „high five“.“ - sm