Unga fólkið heldur uppi vinnslu

Full starfsemi verður í fiskiðjuverum HB Granda í Reykjavík og á Akranesi í sumar. Á meðan starfsfólk fiskiðjuveranna er í sumarleyfum standa skólanemar vaktina.

Á Vopnafirði hefur vinnsla á uppsjávarfiski legið niðri frá því að vinnslu á loðnu lauk þann 4. mars og hefur starfsfólkið verið í sumarfríi að undanförnu. Stefnt er að því að hefja veiðar á síld og makríl í lok mánaðarins og vinnsla ætti því að hefjast þar að nýju í byrjun næsta mánaðar, að því er fram kemur á vef fyrirtækisins.

Að sögn Torfa Þorsteinssonar, framleiðslustjóra HB Granda, hafa um 60 ungmenni verið ráðin til starfa í fiskiðjuverinu á Norðurgarði í Reykjavík í sumar og á Akranesi er fjöldinn um tuttugu og fimm. Líkt og í fyrra verður ekki gert hlé á starfseminni á þessum stöðum.

Magnús Róbertsson, vinnslustjóri HB Granda á Vopnafirði, segir að vinnsla í uppsjávarfrystihúsinu hefjist í byrjun júlí en flestir starfsmanna í vinnslunni nýttu hléið, sem verið hefur frá því að loðnuvertíðinni lauk, til að fara í sumarleyfi.

Þrátt fyrir vinnsluhlé munu um 40 til 45 ungmenni starfa við vinnslu á síld og makríl á Vopnafirði í sumar þannig að þegar á heildina er litið munu allt að 130 skólanemar starfa við sumarafleysingar hjá félaginu í sumar.

- shá