EVE Online kemur út í Kína - næstum því hálf milljón spila nú leikinn

Í dag kemur út kínversk útgáfa EVE Online í Kína en útgáfan er liður í samstarfi íslenska fyrirtækisins CCP og TianCity, eins stærsta framleiðanda og dreifingaraðila tölvuleikja í Kína, við endurútgáfu og markaðssetningu leiksins fyrir Kínamarkað.

Spilarar leiksins eru nú komnir yfir 450 þúsund, en útgáfan í Kína og velgengni nýjustu viðbótar leiksins, Retribution, spila þar stóran þátt. CCP hóf sölu áskriftarleiða að kínverskri útgáfu EVE Online fyrir 7 dögum og hefur sala áskrifta þegar farið fram úr væntingum.

„Kína er einn stærsti tölvuleikjamarkaður heims og netleikir eru þar í mikilli sókn, samhliða aukinni netvæðingu landsins. CCP hefur starfrækt EVE Online í Kína frá árinu 2006, í samvinnu við dreifingaraðilann Optic Communications, þar sem leikurinn hefur vaxið jafnt og þétt, auk þess sem fyrirtækið hefur öðlast mikilvæga reynslu á kínverska leikjamarkaðinum. Samningur CCP við stærri og öflugri dreifingaraðila, og sú þróunarvinna sem hefur átt sér stað á bakvið nýja kínverska útgáfu af leiknum, er í samræmi við áform CCP um aukna sókn á Kínamarkað.

Sérstök foútgáfafa af kínverskri útgáfu EVE Online kom út í júní síðastliðnum og síðan hefur verið unnið að því að leysa ýmis tæknileg atriði í tengslum við útgáfuna og að netþjónar standist það álag sem almenn útgáfa leiksins í Kína hefur í för með sér. Sú vinna hefur gengið vel.

EVE Online, sem fagnar tíu ára afmæli sínu á næsta ári, er nú fáanlegur á fimm tungumálum; ensku, rússnensku, þýsku, kínversku - og japönsku í kjölfar útgáfu CCP á leiknum í Japan í fyrra í samvinnu við leikjaútgefandann og dreifingaraðilann NEXON," segir í tilkynningu frá CCP.