Aldrei meira sæði í sunnlenskar ær

Sauðfjársæðingum hjá Sauðfjársæðingastöð Suðurlands í Þorleifskoti í Laugardælum í Flóahreppi á þessari fengitíð er lokið. Hrútarnir fá nú kærkomið jólafrí enda hafa þeir verið undir miklu álagi undanfarnar vikur.

„Hjá stöðinni gekk sæðistaka og útsending ákaflega vel og var áhugi, þátttaka og útsending meiri en nokkru sinni fyrr. Frá stöðinni var sent út sæði í 22.775 ær sem er met. Ef reiknað er með 70% nýtingu á sæði, sem er algengt, má reikna með að 15.900 ær hafi verið sæddar með sæði frá stöðinni. Til samanburðar var sent út sæði í 18.440 ær í fyrra og útsending þessa árs því 4.335 skömmtum meiri en ársins 2011", sagði Sveinn Sigurmundsson, framkvæmdastjóri stöðvarinnar.

Þá má geta þess að mest var sent út þann 13. desember en þá var afgreitt sæði í 1.825 ær. Mest var sent út úr eftirtöldum hrútum:

Birkir 2.420 skammtar

Ás 1.705 skammtar

Grámann 1.570 skammtar

Borði 1.570 skammtar

Snær 1.560 skammtar

Kroppur 1.515 skammtar

Útsending úr Birki er sú næstmesta úr einum hrút á einni fengitíð frá upphafi. Á árinu 2010 voru sendir út 2.865 skammtar úr Grábotna og er það metútsending. Birkir slær hins vegar gömlu meti Rafts frá 2006 við en það ár voru sendir 2.390 skammtar út úr honum.