Smíðakennari hraktist úr starfi vegna ömurlegra vinnuaðstæðna í Laugarnesskóla

Reykjavíkurborg er bótaskyld vegna fjártjóns sem smíðakennari varð fyrir þegar hann þurfti að hætta kennslu í Laugarnesskóla, langt fyrir aldur fram, vorið 2005. Maðurinn var kennari að aðalstarfi um árabil. Hann hóf störf sem handmenntakennari við Laugarnesskóla 1989, en lét af störfum vorið 2005. Mál þetta snýst um það að maðurinn telur að hann hafi hrakist úr starfi vegna þess að vinnuaðstæður hafi verið óboðlegar og gert honum ókleift að starfa, vegna asma, sem hann er haldinn. Kennarinn var í fullu starfi frá byrjun, en í stefnu segir að hann hafi oft verið frá vegna veikinda.

Það voru einkum aðstæður í smíðastofu skólans sem maðurinn gerði athugasemdir við. Í smíðastofunum hafi ekki verið loftræsting og það hefði verið fúkki. Það hafi verið röð með opnanlegum gluggum uppi í kverk, en það hefði myndast hvirfill inni í stofunni ef gluggarnir voru opnaðir. Þá hefði vantað afsog frá vélunum. Hann kvaðst hafa gert margar tilraunir til að fá skólastjórnendur til að lag­færa aðstöðuna, en það hefði ekki verið gert. Myndmenntastofan hefði ekki verið betri fyrir sig, þar hefði verið sveppur í gluggum.

Í dómnum kemur fram að málsgögn sýni að heilsa mannsins hafi lagast eftir að hann hætti störfum. Matsmenn dragi þá ályktun af gögnum og atvikum, svo og eigin skoðun á kennaranum, að vinnuaðstæðurnar í smíðastofunni í Laugarnesskóla hafi haft neikvæð áhrif á heilsu hans. Skýrslur matsmannanna fyrir dómi sýni að þeir telji að maðurinn gæti og hefði getað unnið við smíðakennslu við betri aðstæður en voru í skólanum. Sömu ályktun hafi Davíð Gíslason, sér­fræðingur í lyflækningum og ofnæmissjúkdómum, dregið en Davíð hefur oft annast stefnanda í veikindum hans. Hann tók þó fram að hann hefði aldrei skoðað aðstæður í skólanum.