Áhugi á garðyrkjunámi eykst

Áhugi á námi í ylrækt hér á landi hefur aukist mikið en nú eru 12 nemendur í slíku námi í Garðyrkjuskólanum á Reykjum í Ölfusi. Þar er einnig eina tilraunagróðurhús landsins en Samband garðyrkjubænda var að færa skólanum fimm milljónir krónur í gjöf, sem á að renna til tækjabúnaðar í húsinu.

Það er Landbúnaðarháskóli Íslands sem rekur Garðyrkjuskólann á Reykjum í Ölfusi fyrir ofan Hveragerði en það er eini skóli sinnar tegundar hér á landi. Við skólann fer fram öflug tilraunar- og rannsóknarstarfsemi í glæsilegu gróðurhúsi. Sveinn Sæland, formaður Sambands garðyrkjubænda koma færandi hendi í gær og afhenti skólanum 5 milljóna króna gjöf, sem á að fara í tæki í tilraunargróðurhúsinu.

„Okkur er mjög í mun að hér séu stundaðar hátæknitilraunir. Til þess þarf góðan búnað og við vildum leggja til pening í það," segir Sveinn.

Hversu mikilvægt er þetta húsnæði fyrir ykkur?

„Það er gríðarlega mikilvægt. Hér hafa farið fram mjög öflugar tilraunir, sérstaklega í tómötum og papriku. Við teljum að það sé að skila sér inn í greinina. Aðstæður hér eru á heimsvísu og margar þjóðir öfunda okkur af þessari aðstöðu," segir Sveinn.

Enginn hafði áhuga á að læra ylrækt fyrir nokkrum árum en nú hefur dæmið heldur betur snúist við því 12 nemendur eru í slíku námi í skólanum í dag. Ágúst Sigurðsson er rektor Landbúnaðarháskóla Íslands.

„Ég held ég skýri áhugann bara aðallega í því að fólk sér tækifæri í framleiðslu á þessu sviði, fyrir utan hvað þetta er óskaplega skemmtilegt," segir Ágúst.

Erum við nógu duglega að borða íslenska grænmetið?

„Nei, það hugsa ég nú ekki. Ég hugsa að við mættum gera enn meira af því. Hins vegar eru vinsældir íslenska grænmetisins gífurlega miklar. Þú finnur ekki þann Íslending sem hælir ekki íslensku grænmeti í bak og fyrir," segir hann.