Rúmlega tvær milljónir söfnuðust á uppboði fyrir Ingó

Það söfnuðust rúmlega tvær milljónir króna sem renna óskipt til Ingólfs Júlíussonar, ljósmyndara, eftir uppboð honum til styrktar sem haldið var á Hótel Borg 25. nóvember síðastliðinn.

Ingólfur, sem greindist sem bráðahvítblæði í október, og fjölskylda hans fá féð afhent í þrennu lagi; 844.500.- kr. nú þegar, 1.098.069.- kr. í janúarbyrjun en þá kemur inn það fé sem greitt var með kreditkortum á uppboðinu og loks 201.000.- kr. frá Myndstefi.

Fjölmargir aðilar gáfu vinnu sína, tíma, efni, aðstöðu og þekkingu án endurgjalds og var allur kostnaður í algjöru lágmarki í tengslum við uppboðið að því er fram kemur í tilkynningu.

Allar ljósmyndir sem boðnar voru upp voru gefnar af viðkomandi ljósmyndurum, sem og listaverk eftir listamanninn Tolla og Canon ljósmyndavél frá Nýherja. Beco gaf Holgu myndavél sem allir þekktustu fréttaljósmyndarar landsins tóku myndir á og árituðu.

Uppboðið var haldið á Hótel Borg, sem tók ekkert fyrir aðstöðuna. Veitingar þar komu endurgjaldslaust frá Vífilfelli og Innnes. Velmerkt gaf allan prentkostnað, Svansprent gaf afslátt af prentun, Innrammarinn Rauðarárstíg gaf ríflega tveggja daga vinnu tveggja starfsmanna og fyrirtækið Í réttum ramma gaf vinnu tveggja starfsmanna í eina kvöldstund.

Myndstef og ljósmyndarar gáfu eftir höfundagreiðslur, samtals 201.000 sem renna beint til Ingólfs. Gallerí Fold og Uppboð.is gaf eftir um helming kostnaðar við innrömmun og tók á sig allan kostnað við innheimtu vegna greiðslukorta auk þess að sjá um framkvæmd uppboðsins. Þá gaf Pixlar verulegan afslátt af sínum reikningi.

Ljósmyndararnir sem gáfu verk sín og vinnu, voru eftirtaldir:

Anton Brink

Ari Magg

Árni Sæberg

Christofer Lund

Egill Aðalsteinsson

Friðrik Tryggvason

Gunnar Valberg Andrésson (GVA)

Gassi

Geirix

Haraldur Guðjónsson (HAG)

Hörður Sveinsson

Ingólfur Júlíusson

Jóhann Ágúst Hansen

Jón Gnarr

Júlíus Sigurjónsson

Kristinn Ingvarsson

Ómar Óskarsson

Páll Stefánsson

Pjetur Sigurðsson

Ragnar Axelsson (RAX)

Ragnar Th. Sigurðsson

Sigtryggur Ari Jóhannsson

Spessi

Stefán Karlsson

Vilhelm Gunnarsson

Án þessara ljósmyndara hefði þetta aldrei orðið mögulegt og fá þeir sérstakar þakkir að því er fram kemur í tilkynningu.

Aðstandendur uppboðsins vilja þakka öllum þeim sem komu að því með einum eða öðrum hætti sem og að sjálfsögðu þeim sem keyptu verk á uppboðinu eða styrktu Ingólf með beinum og óbeinum hætti í tengslum við það.