Skondið ef drottningin héti Díana árið 2100

"Það hljóta að vera gleðitíðindi í hverri fjölskyldu að von sé á nýju lífi. Í þessu tilviki nær gleðin þó væntanlega vel út fyrir innsta hring ættmenna, ekki síst til bresku pressunnar", segir Hildur Helga Sigurðardóttir, fyrrverandi fréttaritari RÚV á Bretlandseyjum, innt eftir viðbrögðum við fréttinni um væntanlegan erfingja Vilhjálms Bretaprins og Katrínar konu hans.

Það féll oft í hlut Hildar Helgu að flytja fréttir af dramatískum atburðum í lífi Elísabetar Englandsdrottningar og fjölskyldu hennar, sem oft lét nokkuð illa að stjórn hennar hátignar. Þau Hildur Helga og Svavar Örn lýstu brúðkaupi Vilhjálms og Katrínar í beinni útsendingu á Stöð 2 í fyrrasumar.

„Þessi ungu hjón virðast nú gera allt eftir bókinni og hafa nú uppfyllt sína helstu skyldu, að fjölga sér. Það er sjálfu sér heldur fátt um svona frétt að segja, nema hvað það væri nú svolítið skemmtilegt ef barnið yrði stúlka og þau skírðu hana Díönu. Miðað við langlífið í þessarri fjölskyldu og að því gefnu að konungsveldið verði enn við lýði á næstu öld, þá væri það skondið tilbrigði við allt sem á undan er gengið, ef drottning með því nafni settist í hásætið upp úr aldamótunum 2100", segir Hildur Helga. „Díana heitin spáði því að sjálf yrði hún aldrei drottning og mörgum þótti eiginmanni hennar og tengdaforeldrum ekki farnast sérlega vel við hana", bætir Hildur Helga við. „En sá hlær best sem síðast hlær".

En til að þetta gengi eftir, að drottningin myndi heita Díana, þyrfti að breyta reglum um ríkiserfðir, því eins og lögin eru nú þá gengur karlkynið alltaf fyrir. „Þeir hafa að minnsta kosti hundrað ár til þess," segir Hildur Helga að lokum.