Formaður Sjálfstæðisflokksins mættur til að bera vitni

Bjarni Benediktsson, formaður Sjálfstæðisflokksins, er mættur í Héraðsdóm Reykjavíkur til þess að gefa skýrslu í Vafningsmálinu. Með Bjarna í för var Svanhildur Hólm Valsdóttir, aðstoðarmaður hans. Áður en Bjarni gaf skýrslu var Þór Sigfússon í vitnastúkunni. Þór var forstjóri Sjóvár, en það var eitt aðalfyrirtækið í eigu Milestone.

Hólmsteinn Gauti Sigurðsson saksóknari byrjaði skýrslutökuna á að leggja fram skjöl, sem hann síðan spyr Bjarna út í. Þetta eru meðal annars skjöl með undirritun Bjarna, í umboði Einars Sveinssonar, föðurbróður Bjarna, og Benedikts föður hans. Bjarni mætti til þess að ganga frá skjölunum 11. febrúar 2008. Eftir að Bjarni hafði staðfest, fyrir dómnum í dag, að hann hefði skrifað undir umrædd skjöl í umboði annarra var vitnisburði hans lokið.

Eftir að Bjarni bar vitni tók Jón Óttar Ólafsson við í vitnastúkunni. Hann var annar rannsakenda málsins og starfaði á vegum Sérstaks saksóknara.

Hægt er að fylgjast með beinni textalýsingu á Vísi í gegnum Twitter, efst hægra megin á forsíðu Vísis.