Morðóða barnfóstran lýsir yfir sakleysi

Barnfóstran Yoselyn Ortega, sem sökuð er um að hafa orðið tveimur börnum að bana í íbúð í Manhattan í október síðastliðnum, hefur lýst yfir sakleysi sínu.

Mál hennar var þingfest í gær á sjúkrahúsi í New York-borg. Ortega skar sig á háls eftir að hún stakk systkinin Leo og Luciu til bana. Þau voru tveggja og sex ára gömul. Síðan þá hefur fóstran legið á spítala, nær dauða en lífi.

Lögmaður hennar sagði fjölmiðlum í morgun að Ortega væri þungt haldin, líkamlega og andlega.

Atvikið átti sér stað þann 25. október síðastliðinn. Það var móðir barnanna sem fann lík þeirra inni á baðherbergi íbúðarinnar. Þriðja barnið var með móður sinni í för.