Gillzenegger: Ömurlegt að vera ranglega sakaður um svívirðilegan glæp

Egill „Gillzenegger" Einarsson segir að þó hann sé ánægður með að nú liggi fyrir ákvörðun þess efnis að lögreglan muni rannsaka sérstaklega rangar sakargiftir á hendur sér og unnustu sinni, megi ekki gleyma því að það sé ömurlegt hlutskipti að vera ranglega sakaður um svívirðilegan glæp.

„Ég efast ekki um hver niðurstaða þeirrar rannsóknar verður og að réttlætið nái fram að ganga. Ég get aðeins vonað að þetta verði til að hreinsa mig endanlega af þessum alvarlegu ásökunum," segir hann.

Hann segist lengi hafa verið tvístígandi, hvort hann ætti að fara fram á þessa rannsókn en hann hafi verið til neyddur þegar ljóst var að þeir sem vildu festa hann upp í hæsta tré hafi hvergi látið deigan síga þó ríkissaksóknari hafi vísað málinu á hendur sér og unnustu sinni frá. Egill segist trúa því og treysta að þessi lögreglurannsókn verði ekki til að gera þeim konum sem raunverulega lenda í jafn alvarlegum glæp og nauðgun er, erfiðara að ná fram rétti sínum í framtíðinni.

„Ég ætla ekkert að fara í grafgötur með að þótt saksóknari hafi vísað málinu frá, hefur undanfarið ár í lífi mínu reynst mér og fjölskyldu minni þungbært. Nánast óbærilegt hefur verið að mega reglulega sitja undir grófum svívirðingum, glósum og andstyggilegheitum „réttsýnna", einkum á netinu. Í þeim hópi eru meðal annars landskunnir rithöfundar, háskólakennarar, embættismenn og fleiri; ég furða mig á því hversu gáleysislega þeir fara með ásakanir um refsiverða háttsemi," segir Egill í yfirlýsingu til fréttastofu.