Hannes Pétursson hlaut Verðlaun Jónasar Hallgrímssonar

Verðlaun Jónasar Hallgrímssonar voru veitt við hátíðlega athöfn í Álftanesskóla í dag. Hannes Pétursson, ljóðskáld og rithöfundur, hlaut verðlaunin að þessu sinni.

Það var Katrín Jakobsdóttir, mennta- og menningarmálaráðherra, sem veitti Hannesi verðlaunin en þau eru veitt á degi íslenskrar tungu.

Hannes er eitt helsta skáld þjóðarinnar. Hefur hann sent frá sér fjölda ljóðabóka og annarra verka þar sem oft á tíðum má finna vísanir í menningararf Íslendinga og þjóðlegar hefðir.

Hannes fæddist á Sauðárkróki 14. desember 1931 og var því aðeins 24 ára þegar hann kvaddi sér hljóðs með Kvæðabók sinni sem kom út árið 1955. Ritdómarar og almennir lesendur tóku bókinni með opnum örmum. Mörgum þótti sem annað eins hefði ekki gerst síðan Davíð Stefánsson gaf út Svartar fjaðrir árið 1919.

„Þú sameinar svo margt sem þarf að sameina" sagði Steinn Steinarr við Hannes ungan enda hefur hann löngum verið kallaður brúarsmiður í íslenskri ljóðagerð og má það til sanns vegar færa þó sjálfur hafi hann að eigin sögn aldrei unnið markvisst og meðvitað að neinu slíku.

Alls hafa fjórar ljóðbækur eftir Hannes verið lagðar fram til Bókmenntaverðlauna Norðurlandaráðs. Þær eru: Heimkynni við sjó, 36 ljóð, Stund og staðir og Innlönd.

Verðlaun Jónasar Hallgrímssonar eru veitt á degi íslenskrar tungu, 16. nóvember ár hvert. Í reglum mennta- og menningarmálaráðuneytis um verðlaunin segir að þau beri að veita einstaklingum er hafa með sérstökum hætti unnið íslenskri tungu gagn í ræðu eða riti, með skáldskap, fræðistörfum eða kennslu og stuðlað að eflingu hennar, framgangi eða miðlun til nýrrar kynslóðar.

Verðlaunahafi fær í verðlaun 700 þúsund krónur, ritið Íslenska fugla eftir Benedikt Gröndal og skrautritað verðlaunaskjal. Íslandsbanki veitir verðlaunaféð.