Össur varð efstur

Össur Skarphéðinsson hlaut fyrsta sæti í prófkjöri Samfylkingarinnar í Reykjavík. Niðurstöðurnar voru kynntar á tíunda tímanum. Hann hlaut 972 atkvæði í fyrsta sætið. Sigríður Ingibjörg Ingadóttir varð í öðru sæti. Þetta þýðir að Össur og Sigríður Ingibjörg munu leiða sitthvort Reykjavíkurkjördæmið fyrir alþingiskosningarnar í vor. Í samtali við Vísi segist Sigríður Ingibjörg ekki útiloka formannsframboð í Samfylkingunni.

Á kjörskrá voru 6660 flokksfélagar og fram kemur á vef Samfylkingarinnar kemur fram að 2514 greiddu atkvæði 10 voru ógild. Kjörsókn var 38%.

Fyrstu átta sætin skipast svona.

1. Össur Skarphéðinsson með 972 atkvæði í 1. sæti

2. Sigríður Ingibjörg Ingadóttir með 1322 atkvæði í 1.-2. sæti

3. Helgi Hjörvar með 1205 atkvæði í 1.-3.sæti

4. Valgerður Bjarnadóttir með 1255 atkvæði í 1.-4. sæti

5. Skúli Helgason með 1246 atkvæði í 1.-5. sæti

6. Björk Vilhelmsdóttir með 1350 atkvæði í 1.-6. sæti

7. Mörður Árnason með 1477 atkvæði í 1.-7.sæti

8. Anna Margrét Guðjónsdóttir með 1381 atkvæði í 1.-8. sæti

Ekki þurfti að beita ákvæðum til þess að tryggja jafnt hlutfall kynja.

Kosning er bindandi í 8 efstu sætin.

Ekki mun þurfa að beita fléttulistum.

Þó er ekki ljóst hvort einhverjir eftirmálar verða af prófkjörinu hér i Reykjavík því eins og Vísir greindi frá fyrr í kvöld þá sendi Sigurður G. Guðjónsson kærubréf til úrskurðarnefndar um kærumál og krafðist þess að einstaklingar sem voru útilokaðir frá kjörskrá gætu kært sig þangað inn aftur.