Þrír vilja keppa um Norðfjarðargöng

Útboðsferli Norðfjarðarganga er hafið og segir bæjarstjóri Fjarðabyggðar það mikil gleðitíðindi. Þrír verktakahópar óska eftir að bjóða í verkið. Göngin verða milli Eskifjarðar og Neskaupstaðar, 7,5 kílómetrar að lengd, en markmiðið samkvæmt matsáætlun er að styrkja byggðarlög á Austurlandi með því að tryggja greiðar samgöngur og auka umferðaröryggi.

Austfirðingar hafa lengi kallað eftir nýjum göngum í stað Oddsskarðsganga, sem opnuð voru fyrir 36 árum, og þau hróp urðu hávær í fyrravetur eftir umferðarslys þegar rúta með starfsmenn Alcoa-Fjarðaáls fór þrjár veltur í brattlendi í Oddskarði. Forval verktaka vegna nýrra ganga er nú hafið og þegar frestur rann út í síðustu viku höfðu þrír hópar sótt um að fá að bjóða í verkið; ÍAV og Marti Contractors; Ístak; og Metrostav og Suðurverk.

Páll Björgvin Guðmundsson, bæjarstjóri Fjarðabyggðar, fagnar því í viðtali í fréttum Stöðvar 2 að útboðsferlið skuli nú vera hafið. Þetta séu mikil gleðitíðindi og menn bindi vonir við að göngin verði nú að veruleika í þetta sinn.

Á grafískum myndum frá Verkfræðistofunni Mannviti má sjá hvernig vegir að göngunum munu liggja í landslaginu. Eskifjarðarmegin verður munninn skammt innan við bæinn en Norðfjarðarmegin í Fannardal. Lagðir verða fimm kílómetrar af nýjum vegum.

Bæjarstjóri Fjarðabyggðar bendir á að Oddsskarð sé megintenging Austfirðinga við stofnanir eins og Fjórðungssjúkrahúsið í Neskaupstað og Verkmenntaskólann og einnig fari þar um miklir þungaflutningar vegna sjávarútvegs. Hann segir að þau sveitarfélög séu fá þar sem fjallvegur liggi í 600 metra hæð og í miðju sveitarfélagi. Þetta verði mikil samgöngubót sem hann vonist til að verði að veruleika haustið 2015.

Svo hratt mun verkið þó ekki vinnast, miðað við upplýsingar Gísla Eiríkssonar, forstöðumanns hjá Vegagerðinni, sem segir núna áætlað að tilboð verði opnuð í mars, verkið hefjist haustið 2013 og að verklok verði haustið 2017.